રાહતના સમાચાર : સૌથી પહેલા ગુજરાતમાં કચ્છ જિલ્લો બન્યો કોરોનામુક્ત

રાજેન્દ્ર ઠક્કર/કચ્છ :કોરોના (Coronavirus) ના કહેર અને સતત વધી રહેલા કેસ વચ્ચે કચ્છ જિલ્લામાંથી સૌથી પહેલા રાહતના સમાચાર સામે આવ્યાં છે. ગુજરાતના ત્રણ જિલ્લા હજુ પણ કોરોનાની પહોંચથી દૂર છે, ત્યારે હવે કચ્છ જિલ્લો (kutch) ગુજરાતમાં સૌથી પહેલા કોરોના મુક્ત થયો છે. કચ્છ જિલ્લાના વહીવટી તંત્ર દ્વારા કોરોના પર જીત મેળવાઈ છે. તેમના પ્રયાસો આખરે સફળ થયા છે. તો આ સાથે જ આ ગુજરાત સરકાર માટે પણ મોટા રાહતના સમાચાર કહી શકાય. 
અંતે આજે કચ્છ કોરોના મુક્ત થયો છે. કોરોનાના એક દર્દીનો ફાઇનલ રિપોર્ટ નેગેટિવ આવ્યો હતો. અન્ય 19 સેમ્પલ પણ નેગેટિવ આવ્યા હતા. તો સાથે જ ફ્રન્ટ વોરિયર્સ તરીકે કામ કરતા પત્રકારોના 13 સેમ્પલ પણ નેગેટિવ આવતા તંત્રએ હાશકારો લીધો હતો.

કચ્છ આજે સંભવત કોરોના મુક્ત થવા જઈ રહ્યું છે તેના સંકેતો ગઈકાલથી જ આવવા લાગ્યા હતા. આજે એક યુવાનનો રિપોર્ટ આવવાનો હતો, તેનો અગાઉનો રિપોર્ટ પણ નેગેટિવ આવ્યો હતો. જેથી તંત્રને આશા હતી કે, તેનો આ રિપોર્ટ પણ નેગેટિવ આવશે. કચ્છમાં અત્યાર સુધી 6 કોરોનાના કેસ સામે આવ્યા હતા, જેમાંથી 4 લોકો  કોરોના સામે જંગ જીત્યા હતા. તેમજ એકનું મૃત્યુ થયું હતું, આજે એક કેસનો રિપોર્ટ આવ્યો હતો, જે નેગેટિવ આવ્યો છે. 

વૃદ્ધાએ કોરોનાને આપી મ્હાત
કચ્છના લખપતના આશાલડીના વૃદ્ધાએ આજે કોરોનાને મ્હાત કર્યો હતો. જે કચ્છનો પ્રથમ કોરોના કેસ હતો. આ દર્દીને રજા અપાઇ હતી. કચ્છ કલેકટર અને DDO હાજરીમાં ગઈકાલે વૃદ્ધાને 4 વાગે રજા અપાઇ હતી. Cm વિજય રૂપાણીએ પણ તેમની સાથે વાત કરીને તેમના હાલચાલ પૂછ્યા હતા. 

કચ્છના વહીવટ તંત્રએ કોરોના વોરિયર્સ એવા પત્રકારોની કાળજી પણ લીધી હતી. કોરોના અવેરનેસ લઈને પત્રકારોનો કોરોના ટેસ્ટ કરાવાયો હતો. ભૂજમાં પત્રકારોનો કોરોના ટેસ્ટ કરાયો હતો. કુલ 13 પત્રકારોએ ટેસ્ટ કરાવ્યો હતો અને તમામના રિપોર્ટ નેગેટિવ આવ્યા છે.